बार्ताका लागी गएका मन्त्री र ब्यबसायी बिच मलेसियामा झगडा ।
असार - २०, पोखरा ।
मलेसियासँग द्धिपक्षीय वार्ताका लागि वैदेशिक रोजगार व्यवसायीहरुलाई समेत बोकेर मलेसिया पुगेका श्रम तथा रोजगारमन्त्री दीपक बोहरा एक्लै त्यहाँको सरकारी पक्षसँग भेटेपछि व्यवसायी रुष्ट भएका छन् । यही असार १३ देखि १८ गतेसम्मको मलेसिया भ्रमण मन्त्रालयका सहसचिव गोविन्दमणि भुर्तेल, अन्य दुई अधिकृत र वैदेशिक रोजगार व्यवसायी सङ्घका चार प्रतिनिधिलाई बोकेर मन्त्री बोहोरा मलेसिया पुगेका थिए । तर भ्रमणका क्रममा नेपाल र मलेसियाको द्विपक्षीय वार्तामा व्यवसायीलाई सहभागी नगराइपछि मन्त्री र व्यवसायीको झगडा परेको हो ।
बिहीबार नेपाल फर्किएका व्यवसायीले फर्किएलगत्तै पत्रकार सम्मेलन गरी आफूहरुलाई मन्त्रीले अपमान गरेको बताए । उनीहरुले आफूहरुलाई घुमाउन मात्रै लगेको जसरी टोलीमा सहभागी गरेर बिना उपलब्धी त्यसै फर्काएको गुनासो गरे । व्यवसायीले छलफलमा सहभागी नराउने भए किन आफूहरुलाई लगिएको भन्दै मन्त्रालय र त्यहाँस्थित नेपाली दूतावासले छलछाम गरेको आरोप समेत लगाए । यता शनिबार मात्रै मलेसियाबाट फर्किएका मन्त्री बोहराले आइतबार अर्को पत्रकार सम्मेलन गरेर आफ्नो बचाउ गरे । उनका अनुसार आफूहरुले वार्तामा व्यवसायीलाई पनि सहभागी गराउन चाहे पनि मलेसियाली पक्ष नमानेपछि सकिएन । उनले वार्तामा व्यवसायीलाई सहभागी गराउनैपर्ने कुनै बाध्यकारी व्यवस्था नभएको तर्क पनि गरे । मलेसियाको तर्फबाट पनि वार्तामा कुनै व्यवसायी सहभागी नभएको बोहोराको तर्क थियो ।
विवादको केन्द्रमा मलेसियास्थित नेपालका राजदूत निरञ्जनमान सिंह बस्न्यात थिए । व्यवसायीका अनुसार राजदूत बस्न्यात भिएलएन नेपाल, बायोमट्रिक प्रणालीजस्ता संस्थामार्फत भ्रष्टाचारमा संलग्न छन । उनीहरुले बस्न्यातलाई नेपाल फिर्ता बोलाउन पनि सरकारसँग माग गरे । उक्त आरोपको खण्डन गर्दै मलेसियास्थित नेपाली दूतावासले प्रेस विज्ञप्ति जारी गर्यो । मन्त्री बोहरा मलेसिया भ्रमणका गएको समय त्यहाँका गृहमन्त्री रमदानका अवसरमा साउदी अरबको मक्कामा बिदा मनाउन गएकाले भिएलएन, बायोमेट्रिकजस्ता विवादास्पद विषयमा छलफल हुन सकेन । मलेसियाका मानव संसाधन मन्त्रीसँग मन्त्री बोहराले छलफल गरेका थिए । तर छलफलमा कुनै उल्लेख्य सहमति हुन सकेन । मलेसियामा सबै रमदान पर्वमा व्यस्त भएकोे र बिनातयारी गलत समयमा भ्रमण भएको व्यवसायीले आरोप लगाएका छन् ।
मन्त्री बोहोरा भने भ्रमण उपलब्धीपूर्ण भएको दाबी गर्छन । भ्रमणमा मलेसियाका मानव संशाधनमन्त्री दातो स्रि रिचार्ड राइट अनक जेइमसँगको द्विपक्षीय भेटवार्तामा नेपाल र मलेसियाबीच श्रम सम्झौताका विषयलाई प्राथमिकता दिएर छलफल गरिएको उनले बताए । भेटवार्तामा मलेसियामा कार्यरत नेपालीको सेवा र सुरक्षाका विषयमा समेत सकारात्मक छलफल भएको उनको दाबी छ ।
केही महिनादेखि मलेसियाले नेपाललगायत उसले कामदारले आपूर्ति गर्ने १६ मुलुकबाट कामदार लिन प्रतिबन्ध लगाएकामा नेपाललाई खुलाउने विषयमा भ्रमणमा सकारात्मक छलफल भएको बोहोराको भर्ना छ । मलेसियाको कारागार तथा कैद शिविर (डिटेन्सन क्याम्प)मा गरी ४६१ जना नेपाली रहेको र उनीहरुलाई कैदमुक्त गर्नेबारेमा छलफल भएको उनले बताए । छ नेपालीको शव मलेसियामा रहेकाले त्यसलाई तत्काल नेपाल ल्याउन आफूले पहल गरेको बोहोराको भनाइ छ ।
0 comments
Write Down Your Responses